شاعیر: ڕێوار ئاودانان
کتێب: وشەێل، ئەژ هەفت دەلیا گوارننەم
سەرناو: دمایین پاچا
سەبارەت: نووسین: ئاوات

شەو هەزار و یەکمە
ت، چیرووکەگەت ئەوپەرتخ بردیتە و
وە لەوەیلێگ ک چمانێ هەفت قوڵف بێ‌کلیل لە لێیان دایتە
لە بان مۆبڵە وەنەوشەگەێ ژوورەگە،
خەو کەفتێیەسە لێت.
بەڵام من
وە قۆڕشکەگەێ خالیی قاوەگەم
ک هیرۆگلیف دۊابینی و پێشزانی لە ویر بردێیە
دنووڕم و
هۊر لە بانەشەو و شەوەیل داهاتوو دکەم
هۊر لە ئەژدەها هەفتسەرەگەێ تەنیایی
ک هەمۊشە ها خەوەر؛
هۊر لە وەفرە قورسەگەێ بێ‌دەنگی
ئەڵ بان شوون‌پاگان بۊچگ بەختەوەری
ئوو هۊر لە یە ک، چۊ وە بێ چیرووک ترەکێ
ک دجارە خۊن گەرم دەنگت
دەناو داڵانەگەێ سەردوسڕ ڕەگەیلم بخەێدەو ڕێ
م لە شارە ڕەش و تیەریکەگەێ مردەیل
دژیینید؟ !

++++++++++++++++++++++