شاعیر: کاکەیی
کتێب: شیعرەکانی حیلمی کاکەیی
سەرناو: هەزاران سەلام وە مام محەمە
سەبارەت: بۆ مام موحەممەد

هەزاران سەلام وە «مام محەمە»
دەروێش موخڵیس دۆشت ئەقدەمە


ڕەونەق مەجلیس زەوق و زەمزەمە
چەند تەعریف بکەم هێمان هەر کەمە


چە دەروون بەرکەر خەیاڵ و غەمە
وەختەن ڕەوشەن بۆ ئەی تاریک تەمە


هەر کەس بنۆشۆ جەور و ستەمە
قاڵ مۆ جە کوورەی ساحێب کەرەمە


لەشکر ئامادەن شۆڕشت هەم هەمە
خەوەردار بومێ جەی وەخت و دەمە


دەلیل دەستگیرن نووری دوو چەمە
مەویانۆم وە پای قەتار و ڕەمە


زەمیرت ڕەوشەن چون شەوق شەمە
چون ساز خۆش خوان پڕ زیل و بەمە


زاڵم گرفتار دەرد و ئەلەمە
دەمارێ شێتی چە تۆی کەللەمە


فەقیران مەسئوول وەبێ مەحکەمە
شکەست خاس نمۆ وە سەد مەجلەمە


مونکیران وەنێش قڵنج و قەمە
وە زەرب ساتوور مەدڕان لەمە


فریاد ڕەس مەوجوود ها جە وەر چەمە
بەدان گرفتار مەحرووم جە شەمە


یە فەقیر واتەن وەبێ هامدەمە
ئەشعارم خاڵیس دوانزدە ڕەقەمە

++++++++++++++++++++++