شاعیر: کاکەیی
کتێب: شیعرەکانی حیلمی کاکەیی
سەرناو: ئیبتیدا بە نام حەی لایەنام

ئیبتیدا بەنام حەی لایەنام
خالق المخلوق تەمام خاس و عام


سڵام بۆ وەنەت فەقێ خۆش کەلام
دۆعا گۆتانم جە سوب تا وەشام


واجیبەن پەی یار عیززەت و ئیکرام
نەوا پەی نەزان ئاڵچاغ و لەگام


ئەمسالت نییە تا وە میسر و شام
هەفتەێی جارێ بنیشە جە لام


ئەی جیفە هیچەن اخر الانجام
بێزارم جە دەست میللەت نەفام


کەی ساڕێژ مەبۆ ئەی عیللەت و زام
نەزدیکەن لوقمان بکیانۆ دەوام


ڕاستی نەمەندەن چە دەور ئەیام
نمەیۆ وەکار نماز و صیام


سالم و سەلیم شەرتەن پەی ئیسلام
کەسب و کەسابەت یەکسەر بی حەرام


حەڵاڵ نەمەندەن جە لای خاس و عام
وەختەن ڕەوشەن بۆ ئەی شەب ظەلام


بێ ڕەحم و ئینساف گشت ساحێب ئەقڵام
گرفتار وەدەست ئەی نەفسی لەوام


خانەی دڵ وێران ئیمان کەرد ئیزهام
وەشەو مەوینی عەجایب ئەحلام


فەقێ مەعلوومەن وەخیمەن ئەنجام
گشت خەتا و گونا بڕیان وە باڵام


مەر... سوار بەیۆ وە هانام
نابینا و زەعیف نییەن توانام


بەحر هەقیقەت تەمام نەوانام
تەرتیب کەم کیتاب چون عومر خیام


جە ڕووم و ئێران مەقبوڵ وە دەوام
إنّ الله محیط مەعرووف لە کەلام


وەبێ ئەمر هەق نمەیۆ ئیلهام
ئەر نیک و ئەر بەد جەی دۆڵاب دام


جە یەک فابریقە ئیجاد کەرد خودام
هەنی چە مەحشەر هیچ نییەن پەروام


مەعسووم و فەقیر جەننەتەن مەئوام
ئەر خیلافم وات بکەردێ خەفام


ضەمائیر ڕەوشەن وە یار مۆ غوڵام
جامەی مەجازی ئەی دەباغی خام


ئەشعارم ناقس باقی والسلام

++++++++++++++++++++++