شاعیر: ڕێوار ئاودانان کتێب: وشەێل، ئەژ هەفت دەلیا گوارننەم سەرناو: ( سۊرەگوڵێگ دەناو ئاگر ) سەبارەت: نووسین: ئاوات ڕووژەیل، کرچ‌کاڵن و شەو، چراێگ فرە دۊکەڵکەر ئەۊدارکردە ئەژ لق لەرزووک هەوەس و کەڵکەڵە. دیوار، چەمکێگە نزیک وە لاوار چوارباڵ، ژە بوو گەن‌پێس وێرانی پەنگاوپەنگە. بنووڕ ماڵەگە ڤە بەڵگە و پەڕەێ ناسنامەێ دروویین چۊ هەبۊن سەرەمەرگ خوەێ، وەک مرداوێگ جاڕ دەێد! پەردەیل، پەردەیل بێ‌ئاگا لە پەلەوەربۊن خوەرگەل پەنجەرەگە ئەڕا بەرزەک تیەریکی تاڕاننە و شاروەدەر کردنە ئوو چراێ ئاینە، کوشیاسەو گوڕە و هاوار ڕێویارەیل گوم‌بۊەێ دەلیاگان ئەژنەوی؟ ! وە وێنەێ سان... وێنەێ ئاغم من زەوینم! دووسیامە ئەڵ ئاسانەێ تین و پەێتاو ئوو گیاێ 'ئازادی' چی تەوتەم کەڤنێ دە هێمن‌ترین جاگەێ دڵم و هەشارترین قوڕنەل یاێهووشم وە پاک و ناونازار ئەزانم. لاڵکە و نقا کەرم ڤە وشەیل پڕ ئەژ کەمووتەر و بێ‌دەنگیی کیەوێگ. دووسیامە ئەڵ ئاسانەێ تین و پەێتاو سەرتاپا تەڕ و تلیس! پێڵەیل چاوانم لە ژێر سمکوو ئەسپەیل سەرکێش پەژارە، پەنەمیاێەن هاوشێوەێ ئەو ئاسوور ئاوسە ک دڵ ژە خوان و خواردەمەنییەیل ئاسمان بڕی. چ وەزەن بکوژێگە ڤەرتەرمەێ چەوەنووڕی بنووڕ لاشەێ چرکە ــ گەڵاگان پایزی چۊن لە هسار ماڵەگە ئەۊڕزن! لە ئاسانەێ تین و پەێتاو سەرتاپا تەڕ و تلیک وسامە ئاسووەیل درێژەپێدان، کپ و گیریاێەن ئوو دەشت هەوا لە ژێر پەردەیل کەڕکەڕەمزێ، قورخ کریاێە. گزگ‌جاڕەیل پەنجرە هانە کوورە؟ لۊتگەێ بەرز هەتاو ها کوورە؟ نەێڤینی میلە و زەنجیرەل، مارش بێ‌شەرمیی خوەێان چ ڤە ڕیداری و پێڵی ژەنن؟ ڕازان و چیرووک، تا درەنگانێگ وەیجوورە بییە و م ئێمکە ئەڵ ئاسانەێ تین و پەێتاو هووسیامە بێ ک چەۊەڕێی یارمەتیی 'یار'ێ بووم. ئەرێ! دەسوور وسان وە هۊچ زانسمە و لە داتەکێگ خۆماکی سەرپێچی کردمە ک مرۆڤ ناچار دکەێ تا خوەێ لە بڵێنای بێ‌بایەخ چێژ و خوەشییەیل چوارمێخە بکەێدن. ئەو بەرزەچڕ ڕۊتەنک و بێ‌خەوش یەێ‌مقومە دۊنید ک وەگەرد پاکییەیل وەل تیشکەگان و ڕووبارەیلا پەێوەن زۊنەێ درێ؟ ! ئەو بڕگەێ ڕەنگینە ئەژنەوی ک ژە چگا و گەڕەیل نادیار بەڵام سەوز چۊ ئەڵکەێد، ئوو خار کەێ تا نزیکەو بوو... بڕەسێ، ئوو وەل خۊنما تێکەڵەو بوو؟ ! ئەسە دووارە وە خوەر ئیشم 'سڵام' ئوو بنەتۊمەیل بێ‌دەنگی دەنام لەشم چقیڕە دەن دروودێگ هنارم ئەڕا ئازادی ئوو پەڕەگوڵەیل سۊەر تاسەمەنی، لەناو ڕەگەیلم دپشکڤن ئڕا ئەڤین، لەنوو سروودێگ دەشم [و گوورانییێگ چڕم] ئوو وێشییەگان ئاواز، وەرد سروەێ ک لە گیان منا ڕەوانە هەڵسن وە هەڵپەڕگە؛ تا داسەیل و داوڵەیل هەوا بدریەنە هەراهەریی لەهۊرچیینێگ لێڵ و کەس‌نەزان. ... ئاهـ! من چ لێواولێوم هەگ خەێاڵ، خزێیە ناو لار و لەش چشتەگان و خەسپەن چەم دەس پێ دکەێ... ئەژ دەرڤەچەل ئەۊکردەێ ئاینە ئەۊ کەسنەناس گوجەر خەمگینە دیارە ک لە ئەولاێ ئاسۆگەل پڕ ژە گوڵوەچ شەوەکیان وە خوەشڵەخوەشی، گوورانیی نووێ مەچڕێ و [لە بانان] وەل ئیمەیا ئاشناس. تەماشاێ ئاینە بکە، تا بانان لە ناوێیا وەدی بکەیت! پەردەگان سزیەن و چەوەیل هۊرمان لە نقۊڕەیل [، لە کەل و لاکۆڵانەیل بنبەس] تەڵوەنە و پەشێون. پەردەگان سزیەن و دەسەیل بەدفەڕ و دێزەێ کارەسات لە دۊردەس تراوێڵکە، چرچیاێە و هەراسانن. باڵەیل گووشماسییەگان، وەرەو ڕووشتا ئەوکریانە و پەلەڤەرەل دەریایی، دەسان کردێیە ئاڤازخوەنن وژ. بژمار! دەریاپەڕ هەۊشەگەێ پشتین ماڵ، پڕ ئەژ کەلاک و تەرم باێکردەو پڕ ئەژ ڕێیەلێ ک ڤە 'هیچ‌کوورە' ئەۊ پەرتەخ ڕەسن. ئوو م، ئێسە ئەڵ ناوەێن فەقارەیل ڕووناک سەرتاپا فیسیاێە دە لیسک ئەفتاو بەردەڵان تیەریک وەرەو ئەو جیگە ک پێویستە، بڕم و هیلمە جی... سۊرەگوڵێگ دەناو ئاگر کردمە ئەۊدی سۊرەگوڵێگ دەناو ئاگر کردمە ئەۊدی. ++++++++++++++++++++++