شاعیر: خۆشناو
کتێب: شیعرەکانی خۆشناو
سەرناو: شاعیر کێیە؟ کێ ئەیناسێ؟

شاعیر کێیە؟ 
کێ ئەیناسێ؟ 

شاعیر دەنگی چەوساوانە
بانگەوازی ژانی گەلە
بەندیە لە بەندیخانانە

شاعیر پەیمان و بەڵێنە
بە نووکی خامەی شەڕ دەکا
شەهیدی بێ سەر و شوێنە

شاعیر گەرمین و کوێستانە
شینی چینی هەژاران و
هاواری بەرزی شاخانە

شاعیر زەردی لێو بە بارە
سۆزی دەرونی هەستێکە
ڕازی دڵی ئەویندارە

شاعیر کەسێکی وەک منە
بە بێدەنگی دێت و دەڕوا
هەر وەکوو سەربازی ونە

++++++++++++++++++++++