شاعیر: ڕێوار ئاودانان
کتێب: وشەێل، ئەژ هەفت دەلیا گوارننەم
سەرناو: ( بۊش کامە وەرزی؟ )
سەبارەت: نووسین: ئاوات

شێوەێ هۊچ‌کام لە وەرزەگان نەێری
نە پرۊسنەکەیل کووچەر، ژە ت بار دکەن
نە بزەێ هەنارەگان، لە لێوەیلت پاکەو دبێ.
نە مەلۊچگەیل، ئەژ ساڕکییەگەت کەمەو دبن
نە ئاواز کیەنییەگان، ژە مێرەوانییت گومەو دبێ.
لەناو دەنگت
بنجگێ هەراێهەر پسا گوڵ دکەێ
دەناو بێ‌دەنگییت
هەڵۆنەیل، هەمیشە ها سوورەو دبن.
هەر ئەو کاتە ک کڵاو کڵاو وەفر
ژە کلگەیلت دڤارێ
ئاگر خوەرەتاوێگ، لە قۊلایی نووڕیند ڕووشنە.
بۊش، ت کامین وەرزی؟ !
ک ئێمکە هەرچی دشمارم
نازانم چەن ساڵانم و
ئەڵ کوورەێ ڕێگە وسامە
ک ئێرنگە هەرچێ دنووڕمە ئاڵبووم هۊرمانەیل
ڕۊداوێگ وەناو گشت وێنەگان هەس
گ ڕۊچگێ نادیارە.
شێوەێ هۊچ‌کام ژە وەرزەگان نەێرید؛
ئوو ساڵان
وەبێ ت
چ بێ‌وەر
چ نیمەچڵ بۊنە!

++++++++++++++++++++++